Puisi Banjarmasin | Apa Nang Ikam Ungutakan Norsitah

Apa Nang Ikam Ungutakan Norsitah
Arsyad Indradi

Bakajutan hujan mandasau
jalanan takulipik atap rumah maingui
ari hilang latat
Danau Kota pantar kahilangan sumangat
Ikam pina kada tahutahu bacugutan di muhara
kaca lalungkang nang sabujurnya sudah
mangabur kana tampias
Apa nang ikam ungutakan Norsitah
Haratan hujan bamula taduh
Norsitah kadada lagi di situ
nang ada guratan jari di kaca :
Hujan dalam ragabadanku talanjur purun
manyapu ngaran nang ikan tulis
di hatiku dahulu hurufhurufnya nang suah
kuhapal bujur malahan tahija dalam igauanku

Danau Kota balangsar balajar mahija
humbayang diriku nang sasain jua mangabur

Kualalumpur, 2004

Puisi Banjar | Mambangkit Batang Tarandam

Mambangkit Batang Tarandam
Arsyad Indradi

Tarandam batang tarandam
Timbul tinggalam diarus banyu
Hilang jua di mata
Hilang jua di hati
Ingat kada jua diingat

Tarandam lawas tarandam
Tarandam lawas diarus banyu
Bangkitakanlah jua batang tarandam lawas
Pusaka paninggalan urang bahari

Mambangkit batang tarandam lawas tarandam
Pusaka bahari nang lawar pang tarandam
Tabangkit jua batang tarandam tabangkit
Barakat kita gawi sabumi

bbaru, 93

** Telah dinotasi menjadi lagu banjar
dimuat di Dendang Banua B.Post ‘93

Puisi Urang Banjar | Ngaran Tapuji

Ngaran Tapuji
Arsyad Indradi

Harum satanggi pudak malati barenteng di galungdua
Bagalang amas bakalung amas basusun batantangtiga
Barupa bungas baharta banyak apalah artinya
Apalah artinya lamunlah adat budi bahasa
kada dipakai kada dijaga
Banyak urang baparigal banyak batanam nyiur
Padahal handayangnya gugur mamparapas

Si Itai mangalangkang mananawaakan paninian
sawaktu sidin mamadahi jangan duduk dimuharalawang
wayah sanja kaina ngalih balaki
Tanda akhir zaman kalu
Banyak papadah urang tuha nang bangaran pamali
dianggap tahayul
Bujur jua banyu gugur ka daun kaladi
Baiingat lawan diri
Hidup di dunia ngaran tapuji
tabawa jua sampai kamati

bbaru, 93

** Telah dinotasi menjadi lagu banjar
dimuat di Dendang Banua B.Post ‘93

Baturai Pantun | Pantun Bahasa Banjar

Baturai Pantun
Arsyad Indradi

Cuka laang di dalam cupak
Kulang kaling buah timbatu
Takurasam kurihing simpak
Handak bujang tapilih balu

Mun malala santan Birayang
Nyiur gading nyiur tundunan
Mun talihat si ading bujang
Liur baik liur baungan

Kaluang guring bagantung
Bagantung di puhun kupang
Mun nasib kada bauntung
Di tangan diambil urang

Banjarbaru, ‘93

Puisi Bahasa Banjar | Kisah Satangkai Kambang

Kisah Satangkai Kambang
Arsyad Indradi

Sampurnaakan ingui satangkai kambang
Supaya mimpi daham galisah
Wayah baisukan dibasuh tangisan kacil
Tapi aku kada handak siapa haja
Maaur hujung kalupaknya
Sabab satiap titik ambun
Adalah suara rintihan riwayat
karinduan

Kada parlu jambangan
Sabab akulah jambangan satiap rintihan
Tuhan kutaruh kayakinan
Jangan angkau sambunyi di balik anganangan

Banjarbaru, 2001